RAMAGITA

shrImahAdeva uvAcha ..

tato jaganmaN^galamaN^galAtmanA
       vidhAya rAmAyaNakIrtimuttamAm.h .
chachAra pUrvAcharitaM raghUttamo
       rAjarShivaryairabhisevitaM yathA  .. 1..

saumitriNA pR^iShTa udArabuddhinA
       rAmaH kathAH prAha purAtanIH shubhAH .
rAGYaH pramattasya nR^igasya shApato
       dvijasya tiryaktvamathAha rAghavaH .. 2..

kadAchidekAnta upasthitaM prabhuM
       rAmaM ramAlAlitapAdapaN^kajam.h .
saumitrirAsAditashuddhabhAvanaH
       praNamya bhaktyA vinayAnvito.abravIt.h .. 3..

tvaM shuddhabodho.asi hi sarvadehinA\-
       mAtmAsyadhIsho.asi nirAkR^itiH svayam.h .
pratIyase GYAnadR^ishAM mahAmate
       pAdAbjabhR^iN^gAhitasaN^gasaN^ginAm.h .. 4..

ahaM prapanno.asmi padAmbujaM prabho
       bhavApavargaM tava yogibhAvitam.h .
yathA~njasAGYAnamapAravAridhiM
       sukhaM tariShyAmi tathAnushAdhi mAm.h .. 5..

shrutvAtha saumitravacho.akhilaM tadA
       prAha prapannArtiharaH prasannadhIH .
viGYAnamaGYAnatamaHprashAntaye
       shrutiprapannaM kShitipAlabhUShaNaH .. 6..

shrIrAmachandra uvAcha ..

Adau svavarNAshramavarNitAH kriyAH
       kR^itvA samAsAditashuddhamAnasaH .
samApya tatpUrvamupAttasAdhanaH
       samAshrayetsadgurumAtmalabdhaye .. 7..

kriyA shrIrodbhavaheturAdR^itA
       priyApriyau tau bhavataH surAgiNaH .
dharmetarau tatra punaH sharIrakam.h
       punaH kriyA chakravadIryate bhavaH .. 8..

aGYAnamevAsya hi mUlakAraNaM
       taddhAnamevAtra vidhau vidhIyate .
vidyaiva tannAshavidhau paTIyasI
       na karma tajjaM savirodhamIritam.h .. 9..

nAGYAnahAnirna cha rAgasaMkShayo
       bhavettataH karma sadoShamudbhavet.h .
tataH punaH saMsR^itirapyavAritA
       tasmAdbudho GYAnavichAravAnbhavet.h .. 10..

nanu kriyA vedamukhena choditA
       tathaiva vidyA puruShArthasAdhanam.h .
kartavyatA prANabhR^itaH prachoditA
       vidyAsahAyatvamupaiti sA punaH .. 11..

karmAkR^itau doShamapi shrutirjagau
       tasmAtsadA kAryamidaM mumukShuNA .
nanu svatantrA dhruvakAryakAriNI
       vidya na ki~nchinmanasApyapekShate .. 12..

na satyakAryo.api hi yadvadadhvaraH
       prakAN^kShate.anyAnapi kArakAdikAn.h .
tathaiva vidyA vidhitaH prakAshitai\-
       rvishiShyate karmabhireva muktaye .. 13..

kechidvadantIti vitarkavAdina\-
       stadapyasadR^iShTavirodhakAraNAt.h .
dehAbhimAnAdabhivardhate kriyA
       vidyA gatAhaN^kR^ititaH prasidhdyati .. 14..

vishuddhaviGYAnavirochanA~nchitA
      vidyAtmavR^ittishcharameti bhaNyate .
udeti karmAkhilakArakAdibhi\-
       rnihanti vidyAkhilakArakAdikam.h .. 15..

tasmAttyajetkAryamasheShataH sudhI\-
       rvidyAvirodhAnna samuchchayo bhavet.h ..
AtmAnusandhAnaparAyaNaH sadA
       nivR^ittasarvendriyavR^ittigocharaH .. 16..

yAvachChArIrAdiShu mAyayAtmadhI\-
       stAvadvidheyo vidhivAdakarmaNAm.h .
netIti vAkyairakhilaM niShidhya tat.h
       GYAtvA parAtmAnamatha tyajetkriyAH .. 17..

yadA parAtmAtmavibhedabhedakaM
       viGYAnamAtmanyavabhAti bhAsvaram.h .
tadaiva mAyA pravilIyate.a~njasA
       sakArakA kAraNamAtmasaMsR^iteH .. 18..

shrutipramANAbhivinAshitA cha sA
       kathaM bhaviShatyapi kAryakAriNI .
viGYAnamAtrAdamalAdvitIyata\-
       stasmAdavidyA na punarbhaviShyati .. 19..

yadi sma naShTA na punaH prasUyate
       kartAhamasyeti matiH kathaM bhavet.h .
tasmAtsvatantrA na kimapyapekShate
       vidya vimokShAya vibhAti kevalA .. 20..

sA taittirIyashrutirAha sAdaraM
       nyAsaM prashastAkhilakarmaNAM sphuTam.h .
etAvadityAha cha vAjinAM shruti\-
       rGYAnaM vimokShAya na karma sAdhanam.h .. 21..

vidyAsamatvena tu darshitastvayA
       kraturna dR^iShTAnta udAhR^itaH samaH .
phalaiH pR^ithaktvAdbahukArakaiH kratuH
       saMsAdhyate GYAnamato viparyayam.h .. 22..

sapratyavAyo hyahamityanAtmadhI\-
       raGYaprasiddhA na tu tattvadarshinaH .
tasmAdbudhaistyAjyamavikriyAtmabhi\-
       rvidhAnataH karma vidhiprakAshitam.h .. 23..

shraddhAnvitastattvamasIti vAkyato
       guroH prasAdAdapi shuddhamAnasaH .
viGYAya chaikAtmyamathAtmajIvayoH
       sukhI bhavenmerurivAprakampanaH .. 24..

Adau padArthAvagatirhi kAraNaM
       vAkyArthaviGYAnavidhau vidhAnataH .
tattvampadArthau paramAtmajIvakA\-
      vasIti chaikAtmyamathAnayorbhavet.h .. 25..

pratyakparokShAdi virodhamAtmano\-
       rvihAya saN^gR^ihya tayoshchidAtmatAm.h .
saMshodhitAM lakShaNayA cha lakShitAM
       GYAtvA svamAtmAnamathAdvayo bhavet.h .. 26..

ekAtmakatvAjjahatI na sambhave\-
       ttathAjahallakShaNatA virodhataH .
so.ayampadArthAviva bhAgalakShaNA
       yujyeta tattvampadayoradoShataH .. 27..

rasAdipa~nchIkR^itabhUtasambhavaM
       bhogAlayaM duHkhasukhAdikarmaNAm.h .
sharIramAdyantavadAdikarmajaM
       mAyAmayaM sthUlamupAdhimAtmanaH .. 28..

sUkShmaM manobuddhidashendriyairyutaM
       prANairapa~nchIkR^itabhUtasambhavam.h .
bhoktuH sukhAderanusAdhanaM bhavet.h
       sharIramanyadvidurAtmano budhAH .. 29..

anAdyanirvAchyamapIha kAraNaM
       mAyApradhAnaM tu paraM sharIrakam.h .
upAdhibhedAttu yataH pR^ithaksthitaM
       svAtmAnamAtmanyavadhArayetkramAt.h .. 30..

kosheShvayaM teShu tu tattadAkR^iti\-
       rvibhAti saN^gAtsphatikopalo yathA .
asaN^garUpo.ayamajo yato.advayo
       viGYAyate.asminparito vichArite .. 31..

buddhestridhA vR^ittirapIha dR^ishyate
       svapnAdibhedena guNatrayAtmanaH  .
anyonyato.asminvyabhichArito mR^iShA
       nitye pare brahmaNi kevale shive .. 32..

dehendriyaprANamanashchidAtmanAM
       saN^ghAdajastraM parivartate dhiyaH .
vR^ittistamomUlatayAGYalakShaNA
       yAvadbhavettAvadasau bhavodbhavaH .. 33..

netipramANena nirAkR^itAkhilo
       hR^idA samAsvAditachid.hghanAmR^itaH .
tyajedasheShaM jagadAttasadrasaM
       pItvA yathAmbhaH prajahAti tatphalam.h .. 34..

kadAchidAtmA na mR^ito na jAyate
       na kShIyate nApi vivardhate.anavaH .
nirastasarvAtishayaH sukhAtmakaH
       svayaMprabhaH sarvagato.ayamadvayaH .. 35..

evaMvidhe GYAnamaye sukhAtmake
       kathaM bhavo duHkhamayaH pratIyate .
aGYAnato.adhyAsavashAtprakAshate
       GYAne vilIyeta virodhataH kShaNAt.h .. 36..

yadanyadanyatra vibhAvyate bhramA\-
      dadhyAsamityAhuramuM vipashchitaH .
asarpabhUte.ahivibhAvanaM yathA
       rajjvAdike tadvadapIshvare jagat.h .. 37..

vikalpamAyArahite chidAtmake\-
       . ahaN^kAra eSha prathamaH prakalpitaH .
adhyAsa evAtmani sarvakAraNe
       nirAmaye brahmaNi kevale pare .. 38..

ichChAdirAgAdi sukhAdidharmikAH
      sadA dhiyaH saMsR^itihetavaH pare .
yasmAtprasuptau tadabhAvataH paraH
       sukhasvarUpeNa vibhAvyate hi naH .. 39..

anAdyavidyodbhavabuddhibimbito
       jIvaprakAsho.ayamitIryate chitaH .
AtmAdhiyaH sAkShitayA pR^ithaksthito
       budhdyAparichChinnaparaH sa eva hi .. 40..

chidbimbasAkShyAtmadhiyAM prasaN^gata\-
       stvekatra vAsAdanalAktalohavat.h .
anyonyamadhyAsavashAtpratIyate
       jaDAjaDatvaM cha chidAtmachetasoH .. 41..

guroH sakAshAdapi vedavAkyataH
       sa~njAtavidyAnubhavo nirIkShya tam.h .
svAtmAnamAtmasthamupAdhivarjitaM
       tyajedasheShaM jaDamAtmagocharam.h .. 42..

prakAsharUpo.ahamajo.ahamadvayo\-
       . asakR^idvibhAto.ahamatIva nirmalaH .
vishuddhaviGYAnaghano nirAmayaH
       sampUrNa Anandamayo.ahamakriyaH .. 43..

sadaiva mukto.ahamachintyashaktimA\-
       natIndriyaGYAnamavikriyAtmakaH .
anantapAro.ahamaharnishaM budhai\-
       rvibhAvito.ahaM hR^idi vedavAdibhiH .. 44..

evaM sadAtmAnamakhaNDitAtmanA
       vichAramANasya vishuddhabhAvanA .
hanyAdavidyAmachireNa kArakai
       rasAyanaM yadvadupAsitaM rujaH .. 45..

vivikta AsIna upAratendriyo
       vinirjitAtmA vimalAntarAshayaH .
vibhAvayedekamananyasAdhano
       viGYAnadR^ikkevala AtmasaMsthitaH .. 46..

vishvaM yadetatparamAtmadarshanaM
       vilApayedAtmani sarvakAraNe .
pUrNashchidAnandamayo.avatiShThate
       na veda bAhyaM na cha ki~nchidAntaram.h .. 47..

pUrvaM samAdherakhilaM vichintaye\-
       doN^kAramAtraM sacharAcharaM jagat.h .
tadeva vAchyaM praNavo hi vAchako
       vibhAvyate.aGYAnavashAnna bodhataH .. 48..

akArasaMGYaH puruSho hi vishvako
       hyukArakastaijasa Iryate kramAt.h .
prAGYo makAraH paripaThyate.akhilaiH
       samAdhipUrvaM na tu tattvato bhavet.h .. 49..

vishvaM tvakAraM puruShaM vilApaye\-
       dukAramadhye bahudhA vyavasthitam.h .
tato makAre pravilApya taijasaM
       dvitIyavarNaM praNavasya chAntime .. 50..

makAramapyAtmani chidghane pare
       vilApayetprAGYamapIha kAraNam.h .
so.ahaM paraM brahma sadA vimuktima\-
       dviGYAnadR^iN^ mukta upAdhito.amalaH .. 51..

evaM sadA jAtaparAtmabhAvanaH
       svAnandatuShTaH parivismR^itAkhilaH .
Aste sa nityAtmasukhaprakAshakaH
       sAkShAdvimukto.achalavArisindhuvat.h .. 52..

evaM sadAbhyastasamAdhiyogino
       nivR^ittasarvendriyagocharasya hi .
vinirjitAsheShariporahaM sadA
       dR^ishyo bhaveyaM jitaShaDguNAtmanaH .. 53..

dhyAtvaivamAtmAnamaharnishaM muni\-
       stiShThetsadA muktasamastabandhanaH .
prArabdhamashnannabhimAnavarjito
       mayyeva sAkShAtpravilIyate tataH .. 54..

Adau cha madhye cha tathaiva chAntato
       bhavaM viditvA bhayashokakAraNam.h .
hitvA samastaM vidhivAdachoditaM
       bhajetsvamAtmAnamathAkhilAtmanAm.h .. 55..

Atmanyabhedena vibhAvayannidaM
       bhavatyabhedena mayAtmanA tadA .
yathA jalaM vArinidhau yathA payaH
       kShIre viyadvyomnyanile yathAnilaH .. 56..

itthaM yadIkSheta hi lokasaMsthito
       jaganmR^iShaiveti vibhAvayanmuniH .
nirAkR^itatvAchChrutiyuktimAnato
       yathendubhedo dishi digbhramAdayaH .. 57..

yAvanna pashyedakhilaM madAtmakaM
       tAvanmadArAdhanatatparo bhavet.h .
shraddhAluratyUrjitabhaktilakShaNo
       yastasya dR^ishyo.ahamaharnishaM hR^idi .. 58..

rahasyametachChrutisArasaN^grahaM
       mayA vinishchitya tavoditaM priya .
yastvetadAlochayatIha buddhimAn.h
       sa muchyate pAtakarAshibhiH kShaNAt.h .. 59..

bhrAtaryadIdaM paridR^ishyate jaga\-
       nmAyaiva sarvaM parihR^itya chetasA .
madbhAvanAbhAvitashuddhamAnasaH
       sukhI bhavAnandamayo nirAmayaH .. 60..

yaH sevate mAmaguNaM guNAtparaM
       hR^idA kadA vA yadi vA guNAtmakam.h .
so.ahaM svapAdA~nchitareNubhiH spR^ishan.h
       punAti lokatritayaM yathA raviH .. 61..

viGYAnametadakhilaM shrutisAramekaM
       vedAntavedacharaNena mayaiva gItam.h .
yaH shraddhayA paripaThedgurubhaktiyukto
       madrUpameti yadi madvachaneShu bhaktiH .. 62..